ठाणे जिल्ह्यातील सर्व शाळा दि, १६ जानेवारी २०२१ पर्यंत बंद- जिल्हाधिकाऱ्यांचे निर्देश

 ठाणे :अन्य देशांमध्ये आलेली कोरोनाची दुसरी लाट लक्षात घेता कोरोनाचा प्रादुर्भाव होण्याची शक्यता  असल्याने ठाणे  जिल्ह्यातील सर्व माध्यमांच्या व सर्व व्यवस्थापनांच्या शाळा दि.१६ जानेवारी २०२१ पर्यंत बंद ठेवण्याचा निर्णय  जिल्हा प्रशासनाने घेतला आहे. या अनुषंगाने  जिल्हाधिकारी राजेश नार्वेकर यांनी संबंधित यंत्रणांना निर्देश  दिले आहेत.

ठाणे जिल्ह्यातील  सर्व माध्यमांच्या व सर्व व्यवस्थापनांच्या शाळा विद्यार्थ्यांसाठी दि. ३१ डिसेंबर २०२० पर्यंत बंद ठेवण्याचे आदेश देण्यात आले होते.परंतु ठाणे जिल्ह्यात जरी  कोरोना विषाणूचा प्रसार नियंत्रणात असला तरी, अन्य देशांमध्ये आलेली कोरोनाची दुसरी लाट आणि इतर राज्यांतील कोरोनाची स्थिती पाहता, सर्व  जिल्ह्यातील सर्व माध्यमांच्या शाळा दि. १६ जानेवारी २०२१ पर्यंत बंद ठेवण्याचा निर्णय जिल्हाधिका-यांनी पालकमंत्री एकनाथ शिंदे व मनपा आयुक्त यांच्याशी विचारविनिमय करुन  घेतला आहे.

ऑनलाईन शैक्षणिक अभ्यासक्रम तसेच शालेय शिक्षण विभागाच्या निर्देशांचे पालन करणे संबंधित शाळा प्रशासनावर बंधनकारक असेल असेही जिल्हाधिकारी राजेश नार्वेकर यांनी स्पष्ट केले आहे.